Ompu Gumba Raja Tambunan ima anak ni Ompu Turutan Tambunan tubu ni Ompu boru Marpaung.Ompu Gumba Raja Tambunan Tubu di Lumba Rau Toba Holbung. Marsiajar doli-doli Ompu Gumba Raja, pinda ma Ompu Turutan sian Toga Holbung tu tano Sigotom dohot Ompu boru Marpaung rap dohot dua anakna ima :
1. Ompu Gumba Raja Tambunan (anak I)
2. Ompu Tuan Mulia Masundung (anak II)
Jala nasida na opat ma parjolo ro tu tano Sigotom, marhuta ma nasida di Lumban Rindang. Nasida ma sipungka tano Sigotom.
Dung marhuta nasida di Lumban Rindang (Sigotom) marujung ma ngolu ni Ompunta Boru Marpaung jala dikubur di tano Sigotom. Dung marujung Ompunta boru Marpaung tinggal ma ditingki i holan nasida na tolu di tano Sigotom.
Dung sadia leleng dung mate Ompunta boru Marpaung, mambuat boru ma muse Ompunta Ompu Turutan sian Ramba Siala Garoga Habinsaran, ima Ompunta boru Sopang namargoar Sondang. Jala nadenggan do marroha Ompunta boru Sopang, sonang do roha ni angka anakna na dua i mangula ulaon nasida rap dohot Ompunta boru Sopang, ai Ompunta Ompu Turutan nungnga matua tingki i.
Dung marujung ngolu ni Ompu Turutan di kubur ma di Lumban Rindang (Sigotom) rap dohot kuburan ni Ompunta boru Marpaung, tinggal ma muse nasida natolu di Sigotom.
Dung adong sabulan dung marujung ngolu ni Ompunta Ompu Turutan, didok Ompunta boru Sopang ma tu Anakna Ompu Gumba Raja dohot Ompu Tuan Mulia Masundung ma songon on :
Ala so adong na huhajongjongkon di tano Sigotom laho nama ahu mulak tu huta ni Tulangmu tu Ramba Siala (Garoga) tinggal ma hamu nadua di Sigotom on ninna Ompunta boru Sopang tu anakna nadua i. Mambege hata ni Ompunta boru Sopang i Ompu Gumba Raja dohot Ompu Tuan Mulia Masundung gabe holan natangis nama nasida, gabe ndang saut be lao Ompunta boru Sopang tu Ramba Siala. Dung adong sabulan nari muse, didok boru Sopang ma muse tu anakna nadua i asa laho mulak muse tuhutani tondong i di Ramba Siala, gabe mangulahi ma tangis nasida.
Alai didok Ompunta boru Sopang ma tu nasida nadua, ndang hatiopan hamu ahu amang, ai so adong nahuhajong-jongkon di tano Sigotom on. Gabe didok Ompunta Tuan Mulia Masundung ma, marpingkir ma jolo hami inang laho mangalusi hatami, gabe sundat malaho muse Ompunta boru Sopang tu Ramba Siala Garoga.
Alani hata ni Ompu Tuan Mulia Masundung i, gabe mardos ni tahi ma nasida nadua, asa dipahissat (dipagodang) Ompu Gumba Raja Ompunta boru Sopang.
Une do roha ni Ompunta boru Sopang di hata i, ai lomo do rohana tinggal di Sigotom, gabe laho ma Ompunta Tuan Mulia Masundung tu Ramba Siala Garoga paboahon tu tondong i (hula-hula), naung di pahissat (dipagodang) Ompu Gumba Raja Ompunta boru Sopang.
Jadi ro ma tondongta sian Ramba Siala Garoga marga Sopang pasahathon ulos tanda Hela tu Ompu Gumba Raja, tanda naung ganti Hela nasida. Jala di sonduk do anggina Ompu Tuan Mulia Masundung, jala hot do nasida di Tano Sigotom.
Dung dapot di tingkina, di pangolohon ma anggina Ompunta Tuan Mulia Masundung, gabe dua ripe ma nasida di Sigotom. Dijangkon tano Sigotom do nasida, ai rap gabe do nasida. Alai ala denggan ni lagu (denggan ni roha) ni Ompunta boru Sopang sai tong do ndang berobah (maruba) partuturon nasida, ai torus tu hamatena sai Inang do didok Ompunta Tuan Mulia Masundung tu Ompunta boru Sopang, gabe samarma partuturon di nasida, jala tubu ma parsoalan di Ompu Gumba Raja doli anakna tu Ompu Tuan Mulia Masundung. Gabe masa ma parbadaan bolon tu Ompu Tuan Mulia Masundung dohot pomparanna.
Ala ni sobuni paraloan i gabe pinda ma nasida sian Sigotom, jala disi ma tarulang tano Sigotom, gabe tubu ma duhut-duhut di alaman ni jabu. Mamereng jorbut ni paraloan i dohot marningot tano Sigotom, ro ma anak ni Nainggolan ima hela ni Ompu Tuan Mulia Masundung di tangkasi ma muse Ompunta boru Sopang taringot tu persoalan i, jala dipatorang Ompunta boru Sopang ma nasasintongna, ai anak ni Ompu Gumba Raja do Datu Bindu. Gabe dotopot ma Ompunta Tuan Mulia Masundung dohot pomparanna mambahen pardamean, jala mulak ma muse nasida tu tano Sigotom.
Jala songon on ma isi ni Padannai :
Anak ni Ompu Gumba Raja do Datu Bindu, tung naso jadi do dohonon ni Ompu Tuan Mulia Masundung dohot pomparanna na angina Datu Bindu, sahat tu pomparanna.
Dijalo Ompu Gumba Raja dohot pomparanna nang Ompu Tuan Mulia Masundung dohot pomparanna pardamean i. Gabe mulak ma muse nasida tu Sigotom alai anggo Ompunta Ompu Gumba Raja dohot Ompu boru Sopang ndang dohot be mulak tu Sigotom, ai nungga matua nasida ndang tolap nasida be mardalan, holan anakna na opat nama mulak.
Ia anak ni Ompu Gumba Raja na opat, ima namargoar :
1. Datu Bindu ; Maringanan di Janji Angkola Pahae (parjolo Tubu)
2. Ompu Gani ; Maringanan di Lumban Rau Sigotom (paduahon)
3. Ompu Banua ; Maringanan di Lobugoti Sigotom (patoluhon)
4. Guru Mangalayang ; Maringanan di Tukka Sibolga (paopathon)
Dung mulak nasida tu Sigotom mangan indahan inaor ma nasida rap dohot Ompu Tuan Mulia Masundung dohot pomparanna, dipapatarma muse isi ni pardamean disi. Jala naso jadi dohonon ni Ompu Tuan Mulia Masundung dohot Pomparanna na anggina Datu Bindu sahat tu Pomparanna.
Gabe maringanan ma nasida di Sigotom.
Dung maringanan nasida di Sigotom, mardos ni tahi ma nasida asa marsipungka hutana manang lobuna. Gabe marhuta ma Ompu Banua di Lobu Julu (hauma Lobu Julu nuaeng di goari) jala ala marhuta do Ompunta Ompu Banua di Lobu Julu ima mulana adong goar luat Sigotom Julu.
Asa Ompu Banua do sipungka huta Sigotom Julu.
Ia Ompu Gumba Raja sada datu na bolon do, alai ndang pola olo ibana pataridahon hadatuonna dohot hapanglimaonna.
Jala poda ni Ompunta Gumba Raja tu sude pinomparna ima :
a. Pantun hangoluan
b. Tois hamagoan
c. Ingkon burju mula-ulaon
Ia Ompu Gumba Raja na marale-ale do dohot Ompu Guling Hasibuan nasian Garoga, jala mula ni parale-aleon nasida ima nialap ni lagu manang haburjuon ni Ompu Gumba Raja on do. Mangihuthon hata ni Ompu Gumba Raja dohot ale-alena Ompu Guling Hasibuan, sisada anak dohot sisada boru do nasida sahat tu pinomparna. Alai ala dao-dao be do parhundul nasida gabe songon naso tarida do parale-aleon nasida.
Mangihuthon hata ni Ompunta Ompu Gumba Raja adong do ninna sada boruna namargoar si Lapian, jala namarhamulian tu anak ni Gultom di Parlombuan, alai dang apala tangkas be binoto manang ise partubuna, pomparanna di Parlombuan.
Taon 1970, mardos ni tahi ma sudena pomparan ni Ompu Gumba Raja laho mangalap saring-saring ni Ompu Gumba Raja dohot Ompunta boru Sopang sian Ramba Siala Garoga, ala marhuta hian do Ompunta disi. Jala dang pola mangalapuhon somba tano hita disi, holan boa-boa do tapatupa disi tu Raja ni huta i ditingki i. jala dinalaho mangkali saring-saring ni Ompunta Gumba Raja hita dohot saring-saring ni Ompunta boru Sopang, denggan do didongani raja ni huta i.
Taon 1971, tapauli ma tu ni Ompunta Gumba Raja rap dohot Ompunta boru Sopang.
Taon 1975, jala laos denggan do tapauli handang/pagar ni Tugu ni Ompunta i sian bosi.
Taon 1976, tanggal 7 Oktober dohot tanggal 8 Oktober toho ari Kamis dohot ari Jumat (dua ari) tapestahon/tahorjahon ma Tugu ni Ompunta Gumba Raja dohot Ompunta boru Sopang.
Jala sude do rap mar-ogung Pomparan ni Ompunta Gumba Raja di namamestahon tugu ni Ompunta i, ima anak dohot boru natininggal dihuta Sigotom dohot nasian Pahae, Janji Angkola, Sigompulon, sian Maraccar, Tukka dohot sude na adong di pangarantoan.
Ia naro tu pesta i nagumodang pomparan ni Ompunta ima nasian Pahae, Janjiangkola, Sigompulon, Pantis, Aek si Tapean. Jala hampir do godangna 200 halak, jala dohot namarbaju martumba be do nasida ditingki pesta ni Ompunta i. Naro sian pangarantoan ima sian Jakarta, sian Pakan Baru 2 halak ima Amanta Juara Tambunan dohot Amanta Maraudin Tambunan, sian Medan Amanta Midian Tambunan, Amanta Agus Tambunan, Amanta Pandita Johan, Amanta Guru Jamin, Amanta Sirait, sian Pahae amanta St.Marhaludin Tambunan dohot par kotacane.
Jala tapatupa do Pesta i dijolo ni jabu ni Amanta Juara Tambunan ima naro utusan sian Pakan Baru.
Jala songon sorangan ni Ompunta Gumba Raja ima Amanta Gr. Oskar Tambunan dohot sorangan ni Ompunta boru Sopang ima Inanta boru Gultom (Alister Tambunan) na sian Lobugoti Sigotom.
BOA-BOA :
Ditingki pesta Bona Taon Tambunan Pagaraji Tahun 2003 nasalpu, nungga be tangkas ahu ( Werfin Tambunan) mangkatai dohot pomparan ni Ompu Tua Mulia Masundung ima Kol. (Purn) Drs. Juara Tambunan, jala nungnga di jalo dohot diolohon nasida ia Ompunta Datu Bindu ima anak siahaan (pertama) ni Ompunta Ompu Gumba Tambunan. Jala tarida doi ditingki Pesta Bona Taon na langsung dipatandahon sada keluaga pomparan ni Ompunta Datu Bindu ima Kel. Brigjen R.M. Tambunan/br. Hutagalung.
Songoni nang tingki di Pesta adat perkawinan ni anak nami Pdt. Champion Tambunan, Sth.
Jadi urutan pomparan ni Ompunta Ompu Gumba Tambunan songonon ma :
1. Op. Datu Bindu ima na di Janji Angkola
2. Op. Gani ima na di Lumban Rau Sigotom
3. Op. Banua ima na di Lobugoti Sigotom
4. Op. Guru Mangalayang ima na di Tungka Sibolga.
